Tuesday, October 23, 2012

self responsibility-social responsibility


తనకు తాను ఉపయోగపడని వ్యక్తి
ఏ సంస్థకి ఏ వ్యవస్థకి ఉపయోగపడలేడు
స్వీయ భాధ్యత స్వీకరించలేనివాడికి
సామాజిక భాధ్యతలెందుకు ?
ఎప్పుడు ఎవడు వస్తాడో
ఏం పట్టుకు వస్తాడో
ఎవడి దగ్గర ఏం కొట్టెయొచ్చో
ఎవడి మీద ఏ అవసరానికి ఎలా వాలి పోవచ్చో
తాను చేయవలసిన విధులు
ఎవడి మీద ఎలా తోసేయవచ్చో
నిత్యం వినూత్న పథకాలు రాసేవానికి
ఈ పూటో ఈ రోజో గడిచిపోవచ్చు
రేపు ఏదో ఒకరోజున ఈ నటన సాగనప్పుడు
ఈ నాటకం తెరపడినప్పుడు
లబో దిబో మన్నా ఎవడు సానుభూతి చూపుతాడు
నిండైన వ్యక్తిత్వం అంటే నీ జీవితాన్ని నీవే నడుపుకోవడం
ఎవరి దయా దాక్షిణ్యాలకో ప్రాధేయపడకుందా
నిరంతర శ్రమైక జీవనాన్ని ఆసరాగా చేసుకోవడం
ఆత్మ వంచనకి తావివ్వకుండా
అత్మాభిమానాన్ని అమ్ముకోకుండా
జీవన గమనాన్ని గమ్యం వైపు నడిపించుకోవడం
తనకు తాను సహాయపడేవానికి దైవం సహాయపడతాడని
గీతాకారుడు చెప్పినట్టు చేస్తున్న కర్మను
నూటికి నూరుపాళ్ళు నమ్ముకోవడం
నీ భాధ్యత నీవు తీసుకున్నావా నిన్ను మించిన స్నేహితుడు లేడు
నీ భాధ్యత నీవే విస్మరించావా నిన్ను ముంచే శతృవు నీవే

Saturday, October 20, 2012

అర్డినరీ............ ఎక్సట్రార్డినరీ...


ఆడవాళ్ళని ఇంతవరకు ఏ మగవాడు
సరిగా అర్థం చేసుకోలేదు.
పాపం ప్రతీ స్త్రీ ఎంతో బాధతో ,
ఆవేదనతో , ఆర్ద్రతతో , కొంచెం కసి తో
మరికాస్త అక్కసుతో స్వాంతనకోసం పలికే మాటలు.
ఒక్కో అక్షరం ఒక్కో బాషలో ఉన్న వాక్యాల్ని
ఎన్ని బాషలు తెలిసినా ఎవడు అర్థం చేసుకోగలడు
ఒక అడుగు ఉత్తరం వైపు మరో అడుగు దక్షిణం వైపు
వేస్తూ సాగే గమనం ఎటువైపంటే
ఎవడి బుర్రకి ఎక్కుతుంది
రెండు అడుగులు ముందుకి
నాలుగు అడుగులు వెనక్కి వెళ్ళే
ప్రయాణ వేగాన్ని ఎవడు మాత్రం అందుకోగలడు

ముందు నీకు నీవు అర్థం అయ్యావా
ఇతరులు అర్థం చేసుకోడానికి అన్నామా
అపర కాళికల్లా విరుచుకు పడతారు
చందమామ తో పోల్చినా, సాగే గోదావరి తో పోల్చినా
కవిత్వపు పైత్యం కాదు నాయనా
అవి బూటకాలని ఏ బాటకో ఆ పయనాలని
వాళ్ళకు మాత్రమా తెలియదా
ఆర్డినరీ యో ఎక్సట్రార్డినరో ఏది నిజమో
వారికి మాత్రం తెలియదా
నిజంగా ఎక్సట్రార్డినరి అయితే
ఏ మగవాడి ప్రమాణ పత్రాల కోసం
గొప్పల మెప్పులకోసమో తిప్పలెందుకో ?
ఆర్డినరీ అన్న సంగతీ బాగా తెలుసు కాబట్టే
పై పై మేకప్పుల కోసం , జిగేళ్ మనిపించే
బిల్లు చూసి కళ్ళు బైర్లు కనిపించే దుస్తులకోసం
ఇంత హైరానాలన్నామా అంతే
పురుషాధిక్యత నశించాలంటూ తిట్ల దండకాలు
ఆర్డినరీ అని బాగా తెలుసు కాబట్టే
పొగడ్తలకోసం, ప్రశంసల కోసం
ఎక్కడ హచ్ డాగ్ వెంటపడదా అంటూ
ముసి ముసి నవ్వులు, ఓరకంటి చూపులు
అన్నన్నా పూరీ జగనన్నా ఎంత పని చేసావన్నా
అబద్దపు లోకాల్లో ఎక్సట్రార్డినరీలమంటూ
ఆశగా ఊరేగుతున్న అతివల టైర్ల గాలి
ఇలా తీసివేసావేమన్నా ??????
అమ్మతనం తనువంతా కప్పుకున్న ఆడదే ఎక్సట్రార్డినరీ
ఆత్మ విశ్వాసం అణువణువునా నింపుకున్న యువతే ఎక్సట్రార్డినరీ
లేనిపోని ఎక్సట్రాలు చేసేదంతా ఆర్డినరీ యే..
..

Saturday, September 29, 2012

దుఃఖమంటే....

 
అనుకున్నది కానప్పుడు
అనుకోలేనిది ఎదురయ్యేటప్పుడు
సాయం పొందినవాడు
హేయంగా ప్రవర్తించేటపుడు
తోడు గా ఉండాల్సిన వాళ్ళు

తోడేళ్ళగా మారినపుడు
నీడలా ఉండేవాళ్ళు
పీడకలలా వేధించేటపుడు
మనుషులల్లో మానవత్వం
మరీచకల్లో మంత్రజలంలా మారినపుడు
విలువల వలువలు ఊడి
నడిబజారులో దిగంబరంగా ఊరేగుతున్నపుడు
ఏం చెయ్యాలో
ఎటు అడుగెయ్యాలో
ఏ చేతిని పట్టుకోవాలో
ఏ చేతిని విదిలించుకోవాలో
తెలియక స్థబ్దుగామారి
కళ్ళలో ఉన్న నీళ్ళి ఇంకిపోయి
ఒక నిర్లిప్త భావన నిలువెల్లా విస్తరించి
అచేతనంగా మారడమే
దుఃఖమంటే
కనురెప్పలకున్న పొరలు కరిగి
జీవితం అసలు ముఖ చిత్రాన్ని
అవగాహన కల్పించి
మనుషుల్ని మనీషులుగా మార్చే
భావోద్వేగ స్థితియే దుఃఖమంటే..............
koodali.org, haaram, jalleda, telugu poetry. traiiner uday kumar 

Monday, September 24, 2012

జాలి పడాల? జోల పాడాలా?


  • జీవితంలో పెద్ద పెద్ద అంచనాలుంటేనే
    ఎదురు దెబ్బలు, వెనక దెబ్బలు ఉంటాయి
    అన్నీంటికీ సిద్ధపడి ప్రయాణించేవాడికి
    ఏదీ అద్భుతంగా ఉండదు
    అసలు అసహ్యంగా ఉండదు
    కాకుల్లాంటి లోకుల అసలు నైజాన్ని
    కాచి వడబోసి త్రాగిన వాడికి
    ఎదుటివారి రెండు నాల్కుల ధోరణి
    ఏరుదాటాక తెప్ప తగలేసే తత్వాలు
    వీసమంతైనా బాధ కలిగించవు
    అసలేమాత్రం రోత పుట్టించవు
    మనుషుల లేకి తనం చూసి జాలి కలుగుతుంది
    వాపును చూసి బలుపనుకొని తెగ మురిసేవారి
    పిల్ల చేష్టలు చిరాకు పెట్టవు చిత్రంగా అనిపించవు
    మునగచెట్టు ఎక్కి కొండముచ్చులాట
    గొప్ప ఆనందాన్ని కలిగిస్తుంది కాని
    అంతా పట్టు ఉన్న వరకే మనకైనా, కొమ్మ కైనా
    తన నీడను తానే నమ్మనివారు ఎవరికి నీడను కల్పిస్తారు
    పడగనీడన చేరిన కప్పలకి తిప్పలు తప్పవు కదా
    పచ్చ కామర్లకి మందెయ్యడం మాని
    లోకం పచ్చగా ఉందని ఆడిపోసుకుంటే
    జాలి పడక జోల పాడగలమా
    జీవితం ఆగక సాగే రలు ప్రయాణమనుకుంటే
    దిగిపోయిన వారి గురించి ఎవరు విచారిస్తారు
    అనుభవాల మూటలు కట్టుకొని
    తమ మజిలీ వచ్చేవరకు మ్యూజింగ్ లతో
    ముందుకు సాగిపోవడం తప్ప...

Wednesday, September 12, 2012

నకిలీ సౌధాలు


చూడు నాన్నా ఇక్కడ ఎవరి లెక్కలు వాళ్ళవే
ఆప్యాయతలు, అభిమానాలు, అనురాగాలంటూ
లేనిపోని, పనికి రాని, సోది కబుర్లు వద్దు.
ఎవరిని ఎలా వాడుకోవాలో
ఎవరితో ఏ పని ఎలా చేయించుకోవాలి
నిచ్చెనలో మెట్లలా ఎలా తొక్కి వెళ్ళాలో
అందరికన్నా పైకి, అందనంత పైకి
వీలైనంతమందిని తొక్కి
పై పైకి మరింత పైకి ఎదగాలనో
ప్రణాళికలు వేసేవారే అంతా
ప్రసంగాలకేమి, పథకాలకేమి

అన్నీ డొల్ల కబుర్లే
ఇసుకలో నైనా నడిచిన అడుగులు
నాలుగు క్షణాలైనా ఉంటాయేమో కాని
వీరి మనసుల్లో సాయం పొందిన వారి ముద్ర
క్షణం కాదు కదా కనురెప్ప పాటైనా ఉండదు
అసలు సాయం పొందామనడం కాదు
నాకు సేవ చేయడం వలన నీకే లాభం
అనే వింత వితండ వాదం వీళ్ళది

ఇక్కడ మనుగడ కోసం పోరాటాలు కావు
ఆధిక్యం కోసం, అందలాల కోసం ఆరాటాలు
యోగ్యుడైన వాడే నిలుస్తాడని డార్విన్
బుద్ధిలేకో లేక వీరి బుద్ధి గుర్తించకో చెప్పాడు
నలుగురినీ వాడుకోవడం తెలిసినవాడే
నిలుస్తాడు గెలుస్తాడని వీరి కొత్త సిద్ధాంతం

ఆకాశాన్ని ఆబగా ఆక్రమించేదామని
సముద్రాన్ని సాధ్యమైనంతగా స్వంతం చేసుకుందామని
వెఱ్రి ప్రయత్నాలను చూసి
ఓ మౌనిలా . ఓ ధ్యానిలా నవ్వుకో
ఉఫ్ మంటూ ఊదితే నిలువునా కూలే
ఓ పేకమేడలా వీరి పతనాన్ని గుర్తించుకో
విలువల పునాధిలేని ఈ నకిలీ సౌధాలు
చరిత్ర పుటల్లో ఎలా సమాధౌతాయో హేతువుతో గమనించుకో

Friday, September 7, 2012

గమ్యమే గమనం వైపు

గమ్యం ఎదురుగా  నీకు కనబడుతుందంటే
చిన్నా  చితకా లక్ష్యంతోనే నీ జీవితాన్ని
సరిపుచ్చుకోడానికి నీవి సిద్ధపడుతున్నావన్నమాట
అలసి సొలసి పోతున్నా..
 విసుకొచ్చి జీవితం పై
 విరక్తి కలుగుతున్నా
వెనుతిరిగిపోదామనే
ఆలోచన వచ్చేలా
కళ్ళకు కాదు కదా
కనీసం కలలో కూడా
నీ గమ్యం నీకు అందనంతగా ఉండాలి
నీ ధ్యాసంతా నీ గమనం పైనే
వేయబోతున్న మలి అడుగు మీదనే
ఎదురుగా బయపెడుతూ
వెక్కిరింతలతో
స్వాగతమిస్తున్న
ఆటంకాల పైనే
అవరోధాల పైనే
వాటిని అధిరోహించేందుకు
అనుసరించాల్సిన నవీన వ్యూహాలపైనే
మన పరుగు ఎక్కడ మొదలైతేనేం
ఇప్పుడు అవసరమా?
గతాన్ని పదే పదే తలుచుకోవడం వలన
గొప్పగా అనిపించవచ్చునేమో గాని
పరుగు మందగించి
గమనం గతి తప్పవచ్చు
ఎంతదూరం వెళ్ళాలో
ఎప్పటి కల్లా చేరుకుంటావో
అంటూ  రేపటి రోజు గురించి
ఆలోచనల్లో పడినా అంతే
అంత దూరమా అంటూ డీలా పడొచ్చు
ఎందుకొచ్చిన వృథా ప్రయాసలంటూ
నీ పరుగును నీవే ఆపుకోవచ్చు
అందుకే ఇప్పటికి పుఅయోగపడని
పనికిరాని ఆలోచనలు మాని
నీ వర్తమానం పై గురి పెట్టు
గమనం సరియైనదైతే గమ్యం అదే
నీ ఒళ్ళోకొచ్చి వాలుతుంది
తనను వరించే వరుడివి నీవే నని
విజయ వరమాలతో నీ తోడుగా నిలుస్తుంది

koodali.org, haaram, jalleda, motivational poetry in telugu, trainerudaykumar 

Wednesday, August 29, 2012

విశ్వ ప్రేమ గానం


జడలు కట్టిన అహంకారం
నలుగురి మధ్య గోడలు కడుతుంటే

కుచించుకుపోతున్న నీ ప్రపంచం
నిన్ను ఒంటరిని చేస్తుంది

ఒక్కరొక్కరుగా నీ వాళ్ళనుకునేవాళ్ళు
మనసు చంపుకోలేక దూరమవుతుంటే

నీ గదిలో నీవు గొప్పగా భావించే హేతువందని
ఇనుపసంకెళ్ళు బందీను చేస్తాయి.

విను వీధిని చేధించిన నీ ధృష్టి
నీ గుమ్మాన్ని సైతం దాటలేక
సంకుచితమవుతుంది.

ఏకాంత జీవితం కాదది
బితుకు బితుకు మంటూ సాగే
ఓ ఒంటరి ప్రయాణం

ఆత్మ సంతృప్తి కాదది
నోరు మెదపలేక
నీ మూర్ఖత్వంతో వాదించలేక
నీ మనసు చేసుకునే ఆత్మవంచన

విశ్వజనీనమైన సర్వంతర్యామిని
సర్వత్రా దర్శించగలిగితే
అహం కర్పూరం లా కరిగి
ప్రతి జీవి లో పరమాత్మ దర్శనంలో లీనమవుతావు

నిన్ను నీవు అర్పించుకునే ఆ క్షణంలో
నేను అనే భావన శాశ్వతంగా అంతమై
అద్వితీయ సచ్చిదానందంలో ఓ భాగమవుతావు
విశ్వప్రేమ గానం లో తీయని రాగమవుతావు

Monday, July 23, 2012

సరస్వతీ మాత భక్తుడే

 
మనిషన్నాక ఆ మాత్రం కళాపోషణ ఉండాలి
లేకపోతే గొడ్డుకి మనిషికి తేడా ఏంటని నటవిరాట్టు
నిక్కచ్చిగా కాదు నిర్భీతి గానే చెప్పాడు
భూమికి జానెడుంటే నేం    బారెడుంటే నేం
అసలు బుర్ర ఉంటే నేం లేకపోతే నేం
ఎవడి కళాపోషణ వాడి తుత్తికోసమో
జానెడు పొట్ట కోసమో
ఎవడి బాధలు వాడు పడతాడు
రంగుల సినిమాలు, బుల్లి తెరలు, అంతర్జాల మాయాజాలాలు వచ్చాక
నాటకాలు మొదలుకొని అన్ని కళలు వెల వెల బోతున్నాయి కదా
ఇక రచయితలంటావా     కొనే పాఠకులు కాదు కదా
కనీసం చదివే పాఠకులు అంతర్ధానమై
రాయాలనే కుతూహలాన్ని చంపుకోలేక
సాధారణ పాఠకులు కాదు కదా
సాహీతీ స్రష్టలమని చెప్పుకు తిరిగే
కుహానా సాహీతీ వేత్తల నుండి కూడా
గోరంత ప్రోత్సాహం లేక
తమ సాహితీ అభిలాషను
సైకతతీరాల్లో ఇంకే సెలయేరుల్లా
ఉనికిని కోల్పోతున్నారు
యవ్వనంలోనే వైధవ్యం పొందిన విధవల్లా
తమ కాంక్షల ఉధృతిని బలవంతంగా నిలుపుకుంటున్నారు
ఎవడో తెగించో, బరి తెగించో
నాలుగు డబ్బులు గుల గుల లాడటం వలనో
తీరని దుగ్ధని తీర్చుకోవాలని పరితపించో
నాలుగు పుస్తకాలు రాసి, స్వీయార్జనతో ప్రచురిస్తే
పెద్దమనసు చేసుకొని ప్రోత్సహించడం మాని
పిచ్చి పిచ్చి కారు కూతలు కూస్తావా
అటకమీద పెట్టుకుంటారో అంగడిలో పెట్టుకుంటారో
లేదా నీ చెల్లని సరుకుని ఎక్కడ తోసుకున్నావో
అక్కడే తోసుకుంటారో నీకెందుకు
సాహితీ సేద్యం చేసే ప్రతీ రచయిత
సరస్వతీ మాత భక్తుడే
ఆమె కృపాకటాక్షాలకు పాత్రుడే.....

(రచయితలందరినీ కట్టకట్టి ఓ ఆసామీ విమర్శిస్తే ఒళ్ళు మండి)
koodali.org, haaram. jalleda. telugu poem 

Monday, July 16, 2012

నీక్కొంచెం తిక్కుందా? లేదా?

 
మనిషన్నాక ఆ మాత్రం తిక్క ఉండాలి
అది తిక్కో కాదో దానికేటి లెక్కో అని
ఏ దిక్కుమాలినోడో తేల్చాల్సిన పని లేదు
ప్రతి అడ్డమాలిన గాడిద ఆడమన్నట్టు ఆడితే
ఎదురు ప్రశ్నించకుండా
డూడూ  బసవన్నలా బుర్ర ఊపితే
నిన్ను మించిన బుద్ధిమంతుడు లేడని
రాముడు మంచి బాలుడని ప్రమాణ పత్రాలు
ప్రశంసల పూల జల్లు పోటీ పడి మరీ ఇస్తారు
ఆర్ద్రతలేని, అనుభూతి లేని
కుహానా కబుర్ల మాయాజాలం కోసం
నీ ఉనికిని , నీ జీవన గమనాన్ని
నీకు నీవుగా రాసుకున్న రాజ్యాంగాన్ని
పదే పదే మార్చుకున్నావా
కుక్కలచింపిన విస్తరి లా మారుతుంది నీ వ్యక్తిత్వం
దారిన పోయిన ఏ దానయ్యో
నీ అస్తిత్వాన్ని, నీ జీవన ఔచిత్యాన్ని
లెక్కకట్టడానికి
అసలు వాడికున్న అర్హత ఏమిటో
వాడు ఉపయోగించే ప్రమాణాలేంటో
బలుపంటారో
పొగరంటారో
కొవ్వు తలకెక్కిందంటారో
నెత్తిన కొమ్ములు మొలచాయంటారో
అనని.   అలిసేలా వాగని
స్పందించాల్సిన పనేమీ లేదు భాయి
ఎదుటివాడితో మనం జీవించేది
కొద్ది క్షణాలో,  మహ కాకపోతే కొద్ది దినాలే
నిత్యం నీతో నిలిచేది
సదా జీవించేది నీకు నీవే
ఎవడి గురించో నీ విలువల వలువలు వదలకు
ఫలితమేమొచ్చినా    తరిచేందో    భరించేదో
నీకు నీవే మిత్రమా
అందుకే నీ తిక్క ఎవడి లెక్కకు అందకు పోయినా
నీ లెక్కల్లో నిలిచినంతవరకు హక్కుగా భావించు
జీవితంలో ప్రతి క్షణాన్ని రమించు......
koodali.org, pavan kalyan, power star, haaram, jalleda, teluguone.com 

Saturday, July 7, 2012

ఆరాటాలు- పోరాటాలు

 
ఎవరికీ ఎవరూ ఏమీ కారు
ఎవరు ఎప్పుడు అడుగు పెడతారో
ఎలా దూరం అవుతారో
ఎందుకు విడిపోతారో
అర్థం కూడా చేసుకోవలసిన అవసరం ఉండదు
అహం పెరిగిందనో
అవసరం తీరిందనో
అసూయ తలకెక్కిందనో
మనకే మనమే తీర్పులిచ్చేసుకుంటాం
మన మనుగడ మనకే
ప్రశ్నార్ధకమవుతుంటే
మన ఆలోచనలు మనకే
అంతుచిక్కకుండా ఉంటే
ఇతరుల ఆలోచనలకు
జీవిత గమనాలకు
భాష్యాలు  ఎలా చెప్పగలం?
కళ్ళకున్న పొరలు ఒక్కటి ఒక్కటిగా
విడగొట్టుకోగలిగితే
ఎదుటివారి నిస్సహాయతను
అర్థం చేసుకోగలిగితే
తమ ఉనికిని కొనసాగించడానికి
అంతర్గతంగా వాళ్ళు చేస్తున్న సంఘర్షణను
చూచాయగానైనా శోధించగలిగితే
అడ్డుగోడలు అదృశ్యమైపోతాయి
అక్కున చేర్చుకోలేకపోయినా పరవాలేదు
అపనిందనల అభిషేకాలు చేయాలనే
ఆలోచన కనుమరుగయితే చాలు
ఇక్కడ డార్విన్ చెప్పిన మనుగడకోసం పోరాటాలు కాదు
ఆధిపత్యం కోసం అభిజాత్యాలకోసం ఆరాటం కొనసాగుతుంది
ఈ పిల్లిమొగ్గల్ని, విధూషక వేషాల్ని
అర్థం చేసుకోగలిగితే
ఇక మనస్పర్థలుండవు.
అక్కున చేర్చుకోవాలనే ఆశ పుడుతుంది
  స్వాంతన చేకూర్చాలనే ఆలోచన రేగుతుంది.
మన మనసుల్లో మసిబారిన ద్వేషం తుడుచుకుపోతుంది
ప్రేమాభిమానాలు పెల్లుబుకి ,వెల్లువలై ముంచెత్తుతాయి.

Sunday, July 1, 2012

తెలుగు గజల్..

తెలుగు గజల్..

మత్తులో గమ్మతుగా ఊగాలని లేదు
తొత్తులా బానిసనై బతకాలని లేదు

కీర్తి కాంత కాంచనాలే జగతిని నడిపిస్తుంటే
ప్రతి బంధాన్ని పైసా తో కొలవాలని లేదు

అనుమతి నీవు ఇవ్వనిదే అజమాయిషీ నీపై సాధ్యమా
అధికారం ముందు ఆత్మగౌరవం అమ్మాలని లేదు

ఒడ్డుచేరినాక తెప్పతెగలేయడం షరా మామూలే
ఓనమాలని నేర్పిన గురువుని మరవాలని లేదు

అయిదు చుక్కల పూటకూళ్ళ సత్రాల ఆడంబరాలెన్నున్నా
అమ్మ చేతి గోరుముద్దతో  సరి పోల్చాలని లెదు

నీవొప్పుకోనిదే ఓటమి ఓటమి ఎలా అవుతుంది
పడిన చోటే బావురుమంటూ నిలవాలని లేదు
భూమి బంగారాలు కాదు , నా అన్నవాళ్ళే నీ అసలైన ఆస్తి
అహం తలకిక్కించుకొని అందరికి దూరం కావాలని లేదు

ఎందుకు ఉదయ్ ఈ తత్వాలు ఎవడు వినాలని
స్పందించక ఆగిన హృదయాలను వదిలేయాలని లేదు.
koodali.org, haaram, jalleda, telugu poems, motivational poetry 

Sunday, June 24, 2012

పెంచానురా కన్నా!


 ఈ చేతులలోనే నిన్ను పెంచానురా కన్నా!
  నీ  చేతల లోనే నన్ను కాంచానురా కన్నా!


నే చేరలేని గమ్యాలు నిత్యం వేధిస్తుంటే
నా ఆశలుగా మధించి నీపై ఉంచానురా కన్నా!


తడి అందని మడులెన్నో బంజరులౌతుంటే
పరిధి లేని ప్రేమను సదా పంచానురా కన్నా!


నాకై నేను బతకడం నీ రాకతో సరి
ప్రతిక్షణం నీ భవితకై  వెచ్చించానురా కన్నా!


చిరుతిళ్ళకోసం మారాం ఆపడం నాతరమా
శబరినై ముందుగా నే ఎంచానురా కన్నా!

వివేకోదయం కలిగించేది చదువే కదా
ఏ దారిలో నడవాలో సదా ఆలోచించానురా కన్నా!
koodali.org, haaram, jalleda, telugu gazels, telugu poetry

Saturday, June 9, 2012

దాంపత్యం పరిఢవిల్లేనా

koodali.org, haara,. jalleda. telugu gazel 



ఈ జీవితం పరిపూర్ణమయ్యేనా..  నీ తోడే  లేకుంటే
నా వ్యక్తిత్వం సంపూర్ణమయ్యేనా..  నీ తోడ్పాటే  లేకుంటే


ఎన్ని సుడులు, ఎన్ని మునకలు...  ముంచెత్తే  అలలెన్నో
సంసారనావ  ఒడ్డు చేరేనా...  నీవనె  తెరచాపే లేకుంటే


మత్తునింపే మరులు ఎన్నో...  గుభాళించే అత్తరులెన్నో
పూలపాన్పు పల్లవించేనా...  జంటగా నీ సయ్యాటే  లేకుంటే

చేతికందిన లక్ష్యాలు..   విజయానికివే  సాక్ష్యాలు
అంతిమ గమ్యం సాధ్యమయ్యేనా..   నీతో ఆలోచనే లేకుంటే

కవ్వించే  పలకరింపులు.....  ఏమార్చే స్నేహమూర్తులు
తిన్నగా  నా బాట సాగేనా..  ఎర్రని నీ కనుచూపే లేకుంటే


చీకట్లను చీల్చిన ఉదయమా...  ఇక్కట్లను గెలిచిన ప్రణయమా..
దాంపత్యం పరిఢవిల్లేనా.  ....    నామదిలో నీ రూపే లేకుంటే

Monday, May 28, 2012

ఆ బంధం ఎలా మరవగలవు




నిన్ను నిన్ను గా వలచే  .....  ఆ   బంధం  ఎలా మరవగలవు
నిన్ను తనుగా  కొలిచే .  .....  ఆ   బంధం  ఎలా మరవగలవు                                                                                                    ॥నిన్ను॥

'ఏమండి' తో శ్రీకారం చుట్టి,   ఒరేగా పరివర్తన చెంది అడుగడుగున నీతో నడిచిన ..... .. ఆ   బంధం  ఎలా మరవగలవు ॥నిన్ను॥

నీ వ్యక్తిత్వానికి ఓ ప్రతిబింబంగా , జీవన తత్వానికి ఆలంబనగా
నిన్ను నిండుగా చెక్కిన శిల్పి...  ఆ   బంధం  ఎలా మరవగలవు ॥నిన్ను॥

ఓటమి  తో ఉసూరుమంటే, నిరాశతో  నీరసపడితే
నరనరాన ప్రేరణ నింపిన ....  ఆ   బంధం  ఎలా మరవగలవు      ॥నిన్ను॥

నీ  ఆలికి తోబుట్టువుగా, నీ బిడ్డకు చల్లని చెట్టుగా
ప్రతి భాధ్యతలో తానే నిల్చిన...ఆ   బంధం  ఎలా మరవగలవు ॥నిన్ను॥

నీ  ఇంటికి శంఖువు తానై, నీ భవితకు మూలం తానై
నీ విజయపు బావుటా  తానై... ఆ   బంధం  ఎలా మరవగలవు ॥నిన్ను॥

నీ  తప్పుల్ని నిలదీసే వాడు, ఋజుమార్గంలో నిలిపేవాడు
పదిమందిలో నీకై పోరాడేవాడు,  ఆ   బంధం  ఎలా మరవగలవు ॥నిన్ను॥

తుది  పయనాన్ని తన భుజాన మోసి, చితి ఆరేవరకు దుఃఖాన్ని ఆపి
కన్నీటితో భస్మాన్ని నింపిన ఓ హృదయమా, ఆ   బంధం ఎలామరవగలవు                                                                                            ॥నిన్ను॥
a


Saturday, May 26, 2012

పోతే ఏం మోసుకుపోతావ్

koodali.org, haaram, jalleda, telugu kavithalu,
  ..........పోతే ఏం మోసుకుపోతావ్  ........

పైసాకు పడి చస్తావ్ ....   పోతే ఏం మోసుకు పోతావ్
కాసులకు దాసోహమంటావ్.... పోతే ఏం మోసుకుపోతావ్    ॥పైసాకు॥


మా ఇంటికొస్తే ఏం తెస్తావ్.... మీ ఇంటికొస్తే ఏం పెడతావ్
నిత్యం స్వార్థ పురాణాలే ....  పోతే  ఏం మోసుకు పోతావ్   ॥పైసాకు॥


ఎంగిలి చేత్తో ఏనాడైనా ఓ కాకినైనా తరిమావా
పెంటను కూడా ఇంట్లో దాస్తావ్... పోతే  ఏం మోసుకు పోతావ్  ॥పైసాకు॥


కన్న పేగు  బంధమైనా పంచు కున్న రక్తమైనా
వ్యాపారమే నీ వ్యవహారం.....  పోతే ఏం మోసుకు పోతావ్  ॥ పైసాకు॥


ఎదుటివాళ్ళ మొహమాటం నీకు అంతులేని పెట్టుబడి
ఎవరేమనుకున్నా నీకేం ......  పోతే ఏం మోసుకుపోతావ్     ॥పైసాకు॥


జ్ణానోదయం కలిగేనా... జీవన సారం తెలిసేనా
నలుగురు ఎంతగా చీ కొడుతున్నా... పోతే ఏం మోసుకుపోతావ్  ॥పైసాకు॥

Friday, May 25, 2012

మరణమంటే.....

        
           మరణమంటే.....


శ్వాస గమనం ఆగడం         కాదు   మరణం
గుండె కదలిక  నిలవడం           కాదు మరణం    ॥ శ్వాస ॥


ఏ ఎండకు ఆ గొడుగు        ఎంత కాలమీ వేషాలు
నమ్మిన సిద్దాంతాలకు     నీళ్ళు వదలడమే  మరణం  ॥ శ్వాస ॥


గర్జించే సింహంలా       రొమ్ము విరుచుకు సాగాలి
పిరికితనంతో పేడివానిగా     మిగలడమే మరణం      ॥శ్వాస॥


వయసుమీరినాక పలికే      వైరాగ్యాలెందుకు భాయి
ఆశల  వలలో పడి          నీతి దిగజారడమే మరణం    ॥శ్వాస॥

కనిపెంచిన  తల్లిదండ్రుల రుణమీ జన్మలో తీరునా?
వ్యర్థమని వృద్ధాశ్రమాలలో వదిలివేయడమే మరణం   ॥శ్వాస॥


విశ్వాసం కోల్పోయిన వాడి      ఉనికి   ఉండేదెక్కడ
ఇచ్చిన మాటను  గాలికి       వదిలెయ్యడమే  మరణం   ॥శ్వాస॥


ఉదయపు తొలి ఝాములోనే    మధుశాలకు పయనాలా
వ్యసనాలకు బానిసలై     విలువ కోల్పోవడమే మరణం  ।శ్వాస॥

Tuesday, May 22, 2012

శిఖరాన్ని నేను........

      
                                koodali.org, haaram,  శిఖరాన్ని నేను ( తెలుగు గజల్)

 జానా బెత్తెడు లెక్కలకు అందని   శిఖరాన్ని నేను
యువసైన్యాలను ఉరకలెత్తించే శంఖారావాన్ని నేను


అడ్డుగా ఓ గట్టు వేస్తే  ఇంకిపోయే చలమననుకున్నావా?
నింగిని నేలను ఒకటి చేసే  జల సునామీని నేను


ఉఫ్ మని ఊదేస్తే ఆరే దివ్వెననుకున్నావా?
భుగభుగమనే సెగలతో రగిలే జ్వాలాముఖిని నేను


విమర్శల ధాటికి వెనుతిరిగే భీరువుననుకున్నావా?
ఊరకుక్కల అరుపులకు చలించని ఐరావతాన్ని నేను


ఊపిరిపోతే  కనుమరగయ్యే స్మృతిననుకున్నావా?
ఆచంద్రతారార్కం  అందరి హృదిలో నిలిచే ఆదర్శం నేను


మాయామాటలతో మసిపూస్తే కనిపించని అద్దాననుకున్నావా?
చిమ్మ చీకట్లను చెల్లాచెదురుచేసే  'ఉదయ'కాంతిని నేను

Sunday, March 18, 2012

అవాకులు, చెవాకులు




*
ప్రేమైనా, పగైనా
ఎదుటివారి స్పందన బట్టే
ఈ ఇంటి నుండి ఆ ఇంటికి
ఎటునుండి కొలిచినా దూరం ఒకటే

**

ఎవడో విమర్శిస్తున్నాడని
వెంటనే అదే స్థాయి లో రెచ్చిపోకు
జెలోసిల్ గాని ఈనో గాని
వెంటనే వాడి చేతిలో పెట్టు

***

మా ఊర్లో ప్రభుత్వ జాగాలు
తెగ డైటింగ్ చేస్తున్నాయి
భూబకాసురులకి
ఆకలెక్కువైంది మరి

****

గోడమీద పిల్లులు
సిగ్గుతో తలవంచుకుంటున్నాయి
రాష్ట్రంలో మరో కొత్త పార్టీ
అవతరించినప్పటినుండి

****

సంఘసేవ చేద్దామనే
సేవకులు ఎక్కువై పోతున్నారు
అన్నార్తుల, అనాథల పరిస్థితేమో గాని
ఫోటోగ్రాఫర్ లకు రెండు చేతులా పనే

****

తల్లిదండ్రులు దైవ సమానులట
ఆయన వేదిక మీద వీర ప్రసంగం
ఇంతలో అర్జంటుగా కబురు
ఓల్డేజ్ హోమ్ లో అతని తల్లి
వైద్యం అందక మరణించిందట

Monday, January 2, 2012

మరణ శయ్య


శరీరం శకలాలుగా
కనబడని శిధిలాలుగా
అంతర్గతం గా
క్షీణించిపోతూ
కనబడని జ్వాలలేవో
పగలని జ్వాలాద్వీపంలా
లోలోనే మండిస్తుంటే
అహరహం నాకు నేనుగా
ఆహుతవుతూ
అంచెలంచలుగా సమీపిస్తున్న
అర్ధాయుష్షుతో అంతరింపచేస్తున్న
మనసులేని మృత్యువు
శారీరక బాధను మించిన
పరితాపంతో వేదిస్తున్న పశ్చాతాపం
ఆనాడు వినోదం పేరిట
ఆహ్లదం పేరిట
స్నేహితుల ప్రేరణతో
షబాష్ అనిపించుకోవాలని
రింగు రింగులుగా వదులుతూ
నేను పొందిన పైశాచిక
నిరుపయోగ ఆనందం
చీర్స్ అంటూ వెర్రి కేకలతో
జీవితాన్ని జయిస్తున్నామనే
అహంకారాన్ని తలకెక్కించుకొని
మత్తుతో గమ్మత్తులతో చిత్తుగా
తాగి తందనాలాడిన
నా యవ్వన గర్వం
నేడు అతిశయించి
అంతంలేని పుట్టకురుపులుగా
లోలోనే రూపాంతరం చెంది
ఎప్పుడు పోతానో ఎందాక బ్రతుకుతానో
నా శరీరాన్ని కీమోథెరపీ అనే
నిప్పులకొలిమిలో కాల్చి మసిచేస్తున్న
కలియుగదేవుళ్ళకే అర్థం కాకపోతే
చివరి దశలో తోడుంటాడని
తనివితీరా చూస్తున్న ముసలాళ్ళకు
జీవితాంతం కలిసినడవాల్సిన వాడు
కళ్ళముందే హారతి కర్పూరంలా కరిగిపోతుంటే
వెర్రిచూపులు చూస్తున్న నా వాళ్ళకేమి తెలుస్తుంది
చేసిన తప్పుల్ని ఒప్పుకున్న మాత్రాన
నెత్తికెక్కిన రోగం తిరిగిపోతుందా
కనీసం ఇది చదివిన వాళ్ళ అలవాట్లు
మానకపోతాయా? ? ?