రేపటి గురించి ఆశ లేదు
నిన్నటి గురించి ప్రయాస లేదు
నేటి గురించి
ఈ నాటి గురించే
నా ధ్యాస...... ప్రతి శ్వాస
మళ్ళి వస్తానని వీడ్కోలు చెబుతున్న
ప్రేయసి ప్రేమ గా నా చేతిని చుంబించేటపుడు
వచ్చేవరకు ఎలా బతకాలనే బెంగతోనో
నేటి వరకు ఎలా గడపామనే చింతలతోనో
చెంతనున్న చెలి చుంబనాన్ని చేజార్చుకోనా
రేపటి గురించి ఆశ లేదు
నిన్నటి గురించి ప్రయాస లేదు
నేటి గురించి
ఈ నాటి గురించే
నా ధ్యాస...... ప్రతి శ్వాస
చేతుల్లో చిద్విలాసంగా
చిందులేస్తున్న నా చిన్నారి మోముపై
తొలకరిస్తున్న ఆనందపు డోలికలు వీడి
రేపటి వాడి భవిత ఏమైపోతుందనే బెంగతోనో
కోల్పోయిన నా బాల్యపు చింతలతోనో
ముద్దులొలికే చిన్నారి మురిపాలు వదులుకోనా
రేపటి గురించి ఆశ లేదు
నిన్నటి గురించి ప్రయాస లేదు
నేటి గురించి
ఈ నాటి గురించే
ఈ క్షణం గురించే
పరవశించాలనే
పరిమళించాలనే
నా ధ్యాస...... ప్రతి శ్వాస
No comments:
Post a Comment