ఆశ శ్వాసగా

నిశెరాత్రి శశి బింబాన్ని ఎవరైనా చూడొచ్చు 

అర్థరాత్రి అరుణోదయాన్ని తిలకించారా

వసంతకాలాగమనం తో వికసించిన కుసుమాలని 

తనువు పులకించేలా విరిసిన పారిజాతాల్ని పరికించి ఉంటారు 

శిశిరంలో విరబూసిన విరుల సమాహారాలని సృజించారా 

జన సమూహంలో పలకరింపుల ప్రతిధ్వనులలో

పెల్లుబుకుతున్న ఆత్మీయతా రాగాల్ని విని ఉండొచ్చు

ఏకాంత జీవనంలో నిశ్శబ్దం నిండిన స్తబ్ధత లొ 

అనురాగాల నిస్వన యుగళ గీతికల్ని విన్నారా 

ఆరిన చితి బూదిలోంచి ఓ నూతన సృష్టి 

మంగళవాక్యం పలికిన కథలకు మరో మలుపు 

చిరిగిన చరిత్ర పుటల్లోంచి మరో భవితకు నాంది

ఆశ శ్వాసగా బ్రతికేవారికి ముగింపులుండవు

ప్రతీ అడుగు పురుడు పోసుకునే మరో నూతన జీవనమే.